Manoloana ny tranga ara-pahasalamana tao amin’ny Fokontany Antsahatopy, Kaominina Fanambana, Distrikan’i Vohemar, noho ny fihinanana trondro misy poizina izay nahafatesana olona dimy tamin’ireo dimy ambin’ny folo, dia tonga nitsapa alahelo sy nankahery ireo fianakaviana niharamboina Ramatoa Minisitry ny Fahasalamam-bahoaka Dr MANAGNA Monira sy ireo mpiara-miasa aminy. Nanotrona izany koa Andriamatoa IBRAHIM Issa Charles, Solombavambahoaka voafidy tao amin’ny Distrik’Antsiranana I sady Filoha Lefitry ny Antenimierampirenena misahana ny Faritan’Antsiranana, ary Andriamatoa RANDRIAMANANTENA Stipio, Solombavambahoaka voafidy tao Vohemar.

Nisy ihany koa ireo mbola manaraka fitsaboana ao amin’ny Hôpital Salfa Vohemar ka notsidihina manokana. Ny dokotera urgentiste RANDRIAMIFIDY Zafiniavo Dauphin no nitarika ny fanarahamaso niaraka tamin’ireo mpitsabo ao an-toerana.

Nitondra fanafody ny Minisiteran’ny Fahasalamam-bahoaka hanampiana ny fitsaboana ireo marary. Noraisina an-tanàna ihany koa ny fikarakarana ireo mbola manaraka fitsaboana, hatramin’ny fiverenany any an-trano rehefa sitrana tsara.

Nanentana Ramatoa Minisitry ny Fahasalamam-bahoaka mba hitandrina amin’ny sakafo hohanina, ho fiarovana ny fahasalamana. Nanamafy izy fa efa nampitaina amin’ny tompon’andraikitra sy ny mpiasan’ny fahasalamana ny toromarika rehetra ho fisorohana ny tranga mitovy amin’izao, indrindra amin’ny fanentanana ny mponina momba ny fihinanana hazan-dranomasina tsy azo antoka.

Mankasitraka sy misaotra ny fandraisan’andraikitra ataon’ny mpiasan’ny fahasalamana manerana ny nosy ho an’ny vahoaka Malagasy.

MIASA MIARAKA ISIKA HO AMIN’NY FANOVANA, MANASITRANA NY FIRENENA.