Tanterahana anio etsy amin'ny Amphithéatre CHUJRA ny fifidianana izay filoha hitantana indray ny holafitry ny mpitsabo eto Madagasikara.

Lisitra telo no mifaninana ary samy manana ny rafitra eo ambaniny avy. Telo taona ny faharetan'ny fotoam-piasan'ny filoha vaovao ho voafidy.

Tonga nanatanteraka ny adidiny io maraina io i Dr Managna Monira, mpitsabo sy mpikambana feno ao anatin'ny holafitry ny mpitsabo, sady Minisitry ny Fahasalamam-bahoaka. Nandritra izany dia nanentana ireo mpitsabo namany izy mba ho tonga hifidy satria taratry ny maha-sarobidy ny fandraisana andraikitry ny mpitsabo izany fandehanana mamita adidy izany.

Masina ny asa fitsaboana ka ny fisian'ny rafitra matotra toy izao dia ahafahana mifampifehy, mifampizara traikefa amin'ny samy mpitsabo, ary manara-maso ny fampiharana ny zon'ny marary amin'ny fijerena ireo misandoka ho mpitsabo sy manao fitsaboana tsy nahazoan-dalana izay manimba ny asa fitsaboana.

Marihina fa Dr Rakotoniaina Marco Aimé no filohan'ny komity mikarakara izao fifidianana izao, ary Dr Mevasoa Razanatoniarivay kosa no filoha vonjy maika ao amin'ny holafitra amin'izao fotoana izao.

Miasa miara-ka isika ho an'ny fanovana sy ho fanasitranana ny firenena.