Nigadona tao Manakara androany Alakamisy 11 Desambra 2025 ny Mpanolotsaina Avon’ny Fanavaozana ny Repoblika, Kolonely Gervais ANDRIAMIARISOA, niaraka tamin’ny delegasionina izay notarihany ka isan'izany Ramatoa Minisitry ny Fahasalamam-bahoaka, Dr. MANAGNA Monira.

Nandritra izany ny nanolorana ireo fitaovana hanatsarana ny tolotra ara-pahasalamana ao amin’ny Faritra, toy ny kodiarandroa miisa 100 ho an’ireo "Chef CSB", ny "groupe électrogène" ho an’ny Hopitaly CHRR Manakara, ary fiara tsy mataho-dalana ho an’ny Talem-paritra DRS.

Isan'ny laharam-pahamehana amin'izao fotoam-panavaozana izao ny fanatsarana ny rafi-pahasalamana eto Madagasikara ary namafisin-dRamatoa Minisitra ny finiavany hanatsara ny lafiny ara-pahasalamana sy ny kalitaon’ny fitsaboana manerana ny Nosy, indrindra ny eny ifotony.

Nankahery ny mpiasan'ny Fahasalamana rehetra sy nampatsiahy ihany koa Izy fa mitohy ny fanaovam-baksiny "anti-HPV" ho an’ny ankizivavy 9–14 taona ary hisy ny fizarana fanafody faobe hiadiana amin’ny kakantsinay amin’ny herinandro ho avy izao.

Nanamarika ity androany ity ny fandraisana fitarainana sy fifampiresahana mivantana amin’ny mpiasam-panjakana sy ny mponina tao amin’ny efitrano malalaky ny Kaominina Ambonivohitra Manakara, niarahana tamin'ireo Tompon'andraikitra ambony eto amin'ny Firenena.

MIASA MIARAKA ISIKA HO AN’NY FANOVANA, MANASITRANA NY FIRENENA