Tanteraka tao Toamasina ny fitokanana amin’ny fomba ofisialy ny "Laboratoire ACSSQDA" vaovao. Fotoana lehibe notarihin’Andriamatoa Filohan’ny Fanavaozana ny Repoblika, Kolenely RANDRIANIRINA Michael Mivady, sy ny Mpanolon-tsaina Avon'ny Fanavaozana ny Repoblika, niaraka tamin’dRamatoa Minisitry ny Fahasalamam-bahoaka Dr. MAGNANA Monira sy ireo mpikambana sasany ao amin’ny Governemanta, ary ireo manam-pahefana sivily sy miaramila avy eto amin'ny Faritra.

Ity Ivon-toerana fitiliana ity dia vato fehizoron’ny rafitra ara-pahasalamana, manamafy ny fahaiza-manao nasionaly eo amin’ny fitsirihana ara-tsiantifika, ireo singa rehetra ao amin'ny sakafo ary miantoka fanapahan-kevitra ara-pahasalamana haingana sy raitra.

Amin’ny alalan’ity fotodrafitrasa stratejika ity, hanatsara isika ny fanaraha-maso akaiky ireo karazan-tsakafo vantany tafiditra eto amin-tsika, hampihenana ny fahataran’ny valim-pitsirihana, indrindra fa ao Toamasina no misy ny seranan-tsambo lehibe indrindra eto Madagasikara.

Izao no natao mba hanakaiky kokoa ny vahoaka ny tolotra ara-pahasalamana tsara kalitao amin'ny lafiny rehetra satria Zon'ny rehetra tokoa no misitraka izany fahasalamana izany, raha ny fampandrosoana ity Nosy malalantsika ity no tanjona amin'izao fotoam-panavaozana izao.

MIASA MIARAKA HO AN'NY FANOVANA, MANASITRANA NY FIRENENA.