Ny 24 febroary 2026 dia nanatanteraka fivoriana tao Johannesburg, ireo Minisitra misahana ny Fahasalamana rehetra mpikambana eo anivon'ny vondrona "SADC", ary anisan'ny nandray anjara tamin'izany Ramatoa Minisitry ny Fahasalamam-bahoaka eto Madagasikara, Dr. MANAGNA Monira.

Tanjona tamin’ity fivoriana ity ny handinihana sy hanombanana ny toe-pahasalaman’ny mponina amin’ny ankapobeny ao amin’ny Faritra atsimon’i Afrika, indrindra ireo olana goavana mikasika ny fahasalamam-bahoaka.

Nifantoka manokana tamin’ny fiatrehana ireo hamehana ara-pahasalamana sy ny fihanaky ny valanaretina, ny fahavononana hiatrika krizy ara-pahasalamana, ary koa ireo aretina lehibe toy ny raboka na ny tiberkilaozy, ny tazomoka, ny  tsifanjarintsakafo, ary ny VIH/SIDA ny dinika.

Nandritra ny fivoriana dia nohamafisina ny maha-zava-dehibe ny fiaraha-miasa eo amin’ireo Firenena mpikambana ao amin’ny "SADC", mba hanamafisana ny rafitra ara-pahasalamana, hampitomboana ny fahavononana hiatrika loza sy valanaretina, ary hanatsarana ny fisitrahan'ny vahoaka  tolotra ara-pahasalamana tsara kalitao sy maharitra.

Ity fihaonana ity dia maneho indray ny fahavononan’ireo Firenena mikambana ao amin’ny "SADC"  ny amin’ny fanamafisana ny rafi-pahasalamana sy ny ady iombonana amin’ireo aretina mbola mipetraka ho olana aty amin’ny kontinanta Afrikanina.

Nandritra io fotoana io dia nisy ny ady sisika izay nataon-dRamatoa Minisitra mba hanao soroka miara-milanja amin'i Madagasikara  ireo  Firenena hafa ao amin'ity vondrona Afrikana ity, izay naneho ny fahavononany hiaraka hifanohana amin'ny Madagasikara ho fanatsarana hatrany ny tolotra ara-pahasalamana izy ireo.