Tontosa androany 26 mey 2026 ny fitokanana amin'ny fomba ofisialy ny Ivo-toerana fampiofanana ireo infirimiera sy mpampivelona na « Institut de Formation Inter-régional des Paramédicaux » (IFIRP) tao Mahajanga, izay notarihin’Andriamatoa Filohan'ny Fanavaozana ny Repoblikan'i Madagasikara Kôlonely RANDRIANIRINA Michaël.

Nandritra izany koa no nanolorany vola mitentina 3 000 000 Ar ho an'ireo mpianatra ao amin'ny IFIRP ho nofon-kena mitam-pihavanana.

Ho fanatsarana hatrany ny tolotra ara-pahasalamana eny ifotony dia notolorana fiara tsy mataho-dalana misy vata fampangatsiahana ho fitaterana ny vakisiny ny Distrika enina tao amin’ny Faritra Boeny :

• Mahajanga I
• Mahajanga II
• Marovoay
• Ambatoboeny
• Mitsinjo
• Soalala

Tonga nanotrona ny hetsika ny Mpanolotsaina Avon'ny Fanavaozana ny Repoblika, ny Filohan'ny Antenimieram-pirenena, ny Minisitrin’ny Fampianarana Ambony sy Fikarohana Ara-tsiansa, ireo Solombavambahoaka, ireo Tompon'andraikitra ambony avy ao amin'ny Minisiteran'ny Fahasalamam-bahoaka tarihin’Andriamatoa Talen’ny Kabinetra, ary ireo manam-pahefana sivily sy miaramila ary ny mpiara-miombon'antoka isan-tsokajiny.

Ny Fitondram-panjakana dia mametraka tanjona mazava fa zon'ny isam-batan'olona ny misitraka fahasalamana, ary ny Minisiteran'ny Fahasalamam-bahoaka tarihin-dRamatoa Minisitra Dr MANAGNA Monira dia manao ny ezaka rehetra hitondra fanavaozana eo amin'ny sehatry ny fisorohana sy ny fitsaboana ny vahoaka hatrany ifotony.