Notanterahina ny 27 Mey 2026 ny fitokanana tamin’ny fomba ofisialy ny CSB II vaovao tao Kiranomena, ao anatin'ny Distrikan’i Fenoarivobe.

Nanome voninahitra ity lanonana ity ny Sekretera Jeneralin’ny Minisiteran’ny Fahasalamam-bahoaka, niaraka tamin’ireo manampahefana isan-tsokajiny tao an-toerana, notarihin-dRamatoa Lehiben’ny Faritra sy ny Solombavambahoaka voafidy tao Fenoarivobe.

Ity fotodrafitrasa ara-pahasalamana vaovao ity dia vokatry ny ezaka mitohy ataon’ny Fitondram-panjakana amin’ny alalan’ny Minisiteran’ny Fahasalamam-bahoaka tarihin-dRamatoa Minisitra Dr MANAGNA Monira, amin’ny fanavaozana sy fanamafisana ny rafitra ara-pahasalamana fototra manerana ny Nosy.

Tanjon’izany ny hanatsarana hatrany ny kalitaon’ny tolotra ara-pahasalamana atolotra ny mponina sy hampanakaiky kokoa ny fitsaboana eo anivon’ny fiarahamonina.

Nandritra ny lanonana dia nohamafisina fa anisan’ireo laharam-pahamehana ny fanitarana sy fanatsarana ny fotodrafitrasa ara-pahasalamana, satria manampy betsaka amin’ny fanamorana ny fahazoan’ny vahoaka fitsaboana, indrindra ho an’ny reny sy ny zaza ary ireo sokajin’olona marefo.