Teny arahan’asa no tena azo handrefesana ny fiovana, ary ny fanatanterahana ny teny nomena no mampiseho ny finiavana hitondra vahaolana maharitra sy mivaingana ho an’ny vahoaka.

Vaindohan-draharahan’ny Fitondram-panjakana ny famaliana ireo fitakiana ara-drariny sy ny fanatsarana ny fari-piainan’ny olom-pirenena. Ankoatra ireo ezaka atao amin’ny famahana ny olan’ny jiro sy rano, dia anisan’ny laharam-pahamehana ihany koa ny fanatsarana ny tontolon’ny asa sy ny fiahiana ireo mpiasam-panjakana.

Ho an’ny mpiasan’ny fahasalamana manokana, izay miasa anaty toe-javatra mety hitera-doza sy manolo-tena isan’andro amin’ny famonjena aina, dia nekena sy nankatoavina ny tambin-karama mifandraika amin’ny loza ateraky ny asa. Fankasitrahana ny ezaka sy ny sorona ataon’izy ireo izany, sady dingana iray lehibe ho fanatsarana ny tontolon’ny fahasalamana eto Madagasikara. Voamariky ny didim-panjakana nivoaka ny 10 Jona lasa teo izany, araka ny fanapahan-kevitra noraisina nandritra ny Filankevitry ny Minisitra.

Tanteraka izao tombontsoa izao noho ny fifampihainoana sy ny finiavana hitondra vahaolana maharitra, ary noho ny fanohanana sy ny ady sisika nataon-dRamatoa Minisitry ny Fahasalamam-bahoaka, Dr. MAGNANA Monira, izay nitondra ny feon’ireo mpiasan’ny fahasalamana sy niaro ny tombontsoan’izy ireo teny amin’ireo sehatra fanapahan-kevitra.

"Ny manetsa be mbola ho avy."

Mbola maro ireo fanamby sy asa fanarenana miandry ny Firenena. Na izany aza, ny fahafahana mametraka laharam-pahamehana sy manatanteraka tsikelikely ireo fanamby atrehan’ny vahoaka no porofon’ny fanavaozana sy ny fiovana tena misy.