Ny 18 Jona 2026 no notanterahina ny fanokafana tamin’ny fomba ofisialy ireo hetsika lehibe telo natao tao amin’ny Faritra Ambatosoa, Maroantsetra, dia ny Varavarana Misokatra, ny Fanomezan-drà, ary ny fankalazana ny Andro Maneran-tany ho an’ny Faingosela na Drépanocytose.

Ny lanonana dia notarihin’Andriamatoa Préfet-n’i Maroantsetra sy Andriamatoa Médecin Inspecteur, Docteur RALAY Tiana Yves, niaraka tamin’ireo olo-manan-kaja sivily sy miaramila maro.

Nandritra ny fandraisam-pitenenana dia nohamafisina ny maha-zava-dehibe ireo hetsika ireo, indrindra ny fanentanana sy fanazavana ny fepetra takiana amin’ny fanomezan-drà, izay mialohavan’ny fizahana ara-pahasalamana mba hiantohana ny fahamendrehana sy ny fiarovana ny mpanome sy ny mpandray rà.

Ny hetsika Varavarana Misokatra kosa dia natao hampahafantarana ny vahoaka ireo tolotra ara-pahasalamana misy ao amin’ny Hôpitalin’i Maroantsetra, sady hanamafisana ny fifandraisana sy ny fifampitokisana eo amin’ny vahoaka sy ny mpiasan’ny fahasalamana.

MIASA MIARAKA HO AN’NY FANOVANA, MANASITRANA NY FIRENENA.