Ho fanamafisana ny fisorohana sy ny fifehezana ny valanaretina Mpox, dia nisitraka fitaovana fanasana tanana (DLM), fitaovana ho an’ny fahadiovana (kits WASH) ary fitaovana fiarovana manokana (EPI) ny Fitaleavam-paritry ny Fahasalamam-bahoaka Atsimo Andrefana. Fanohanana avy amin’ny Croix-Rouge Malagasy ireo fitaovana ireo.

Hozaraina amin’ireo tobim-pahasalamana ao amin’ny Distrikan’i Toliara I sy Toliara II, ary koa ao amin’ny CHU Mitsinjo Betanimena sy CHU Antanambao ireo fitaovana ireo, mba hanamafisana ny fahadiovana sy ny fampiharana ireo fepetra fisorohana ary fifehezana ny areti-mifindra eny anivon’ny toeram-pitsaboana.

Ity fanohanana ity dia hanampy amin’ny fanatsarana ny tontolon’ny asa ao amin’ireo tobim-pahasalamana, amin’ny alalan’ny fanamafisana ny fanasana tanana, ny fanadiovana ny toeram-pitsaboana ary ny fiarovana ireo mpiasan’ny fahasalamana sy ny marary. Hanampy amin’ny fampihenana ny mety hiparitahan’ny aretina Mpox sy ireo areti-mifindra hafa ihany koa izany.

Ny Minisiteran’ny Fahasalamam-bahoaka dia maneho ny fankasitrahany ireo mpiara-miombon’antoka aminy, indrindra ny Croix-Rouge Malagasy, noho ny fiaraha-miasa sy ny fifanampiana mitohy amin’ny fanamafisana ny paikady momba ny fahadiovana sy ny fiarovana ny fahasalaman’ny vahoaka.

MIARA-MIASA HO AN’NY FANOVANA, MANASITRANA NY FIRENENA