Migadona tao Farafangana ny Filohan’ny Fanavaozana ny Repoblikan’i Madagasikara, Kôlonely RANDRIANIRINA Michaël, mivady. Niaraka taminy tamin’izany ny Mpanolotsaina Avon’ny Fanavaozana, Kôlonely Gervais ANDRIAMIHARITSOA, sy Ramatoa Minisitry ny Fahasalamam-bahoaka, Dr. MANAGNA Monira.

Nanotrona izao fitsidihana izao ireo olom-boafidy sy olom-boatendry isan’ambaratongany avy ao amin’ny Faritra, ary hita tao ihany koa ireo mpiasan’ny fahasalamana sy ny vahoakan’i Farafangana.

Namafisin’ny Fitondram-panjakana ny maha laharam-pahamehana ny fahasalamam-bahoaka, satria nisy fanolorana fitaovana ho fanamafisana ny rafitra ara-pahasalamana. Tao anatin’izany fanolorana izany dia nisy fiara tsy mataho-dalana miisa enina (6) ho an’ny Fitaleavam-paritry ny Fahasalamana sy ny Distrika, ary moto miisa 115 ho an’ny Distrika miisa dimy (5).

Nisy ihany koa ny fihaonana nataon-dRamatoa Minisitra tamin’ireo mpiasan’ny fahasalamana, nijerena teboka vitsivitsy toy ny :

1. Fisaorana sy fankaherezana ireo mpiasan’ny fahasalamana izay manao ny ainy tsy ho zavatra, manompo sy mikarakara ireo mpiara-belona.
2. Fikarakarana ny « Indemnité de risques » ho an’ireo mpiasan’ny fahasalamana.
3. Ny mahakasika ny « Poste budgétaire » ho an’ireo « Bénévoles », izay ezahina hampitomboina.

Mbola maro, hoy Ramatoa Minisitra, ny ezaka atao amin’ny fikarakarana ireo mpiasan’ny fahasalamana, ary an-dalam-panatanterahana izany ireo mpiara-miasa ao amin’ny Minisitera.

Mankahery sy mankasitraka hatrany ny ezaka ataon’ireo mpiasan’ny fahasalamana amin’ny adidy masina ho an’ny mpiray tanindrazana ny Minisiteran’ny Fahasalamam-bahoaka.

Manao tongotra miara-mamindra amin’ny Fitondram-panjakana, amin’ny alalan’ny Minisiteran’ny Fahasalamam-bahoaka, ireo mpiara-miombon’antoka ho an’ny fahasalamam-bahoaka.