Miezaka ny Fitondram-panjakana ankehitriny izay tarihin’ny Filohan’ny Repoblika Andry RAJOELINA, manatsara ny rafi-pahasalamana misy eto Madagasikara. Asa izay imasoan’ny Minisiteran’ny Fahasalam-bahoaka  ho fampiroboroboana ny lafin’ny maha olona ny fahafahan’ny Vahoaka misitraka fahasalamana tsara kalitao sy manaraka ny fenitra, izay tafiditra tanteraka ao anaty politika ankapoben’ny Fanjakana.

Tsy misy manairy ny harary koa ny ankaroan’ny Malagasy dia misedra olana raha sendra ny tampoka ka miditra hopitaly vokatry ny aretina ary maro no sahiran-tsaina amin’ireny fotoan-tsarotra ireny.

Ho fitsinjovana ireo olona tojo tsy fahasalamana tampoka, toy ny Lozam-pifamoivoizana, ireo aretina maro samihafa izay mety mahazo ny tsirairay, dia natao maimaim-poana ny fisitrahana ny « vonjy aina » na « Fond de premiers soins d’urgence » eny anivon’ireo Hôpitaly miankina amin’ny fanjakana,izay tonga hatr’ny anivon’ireo CSB nanomboka tamin’ity taona 2024 ity.  

Satria « Sarobidy tokoa ny Aina » dia  nanampy sy namaha ny olan’ny olona maro araka izany ny fisian’ny tolotra maimaim-poana ary nanafaingana ihany koa ny fandraisana an-tanana ireo marary ho fanavotan’aina.

Paik‘ady iray izay nirosoan ‘ny Fitondram-panjakana ny fampahafantarana izany ho an’ny sarambabembahoaka, ahafahana misoroka ny kolikoly, ary mampirindra an-tsakany sy an-davany ny andraikitra izay iantsorohan’ireo mpiasan’ny fahasalamana. 

Nanomboka ny 15 Oktobra 2021 ny nametrahan’ny Filoha tamin’ny fomba ofisialy an’io fonds de premiers soins d’urgence io ary efa aman’hetsiny ny Vahoaka Malagasy tra-doza na narary tampoka no efa nisitraka izany tolotra izanymandrak’ankehitriny.