Nisy ny fihaonana teo amin-dRamatoa Minisitry ny Fahasalamam-bahoaka, Dr. MANAGNA Monira sy ireo Delegasiona avy amin'ny Australian Doctors For Africa, izay nifantoka tamin’ny fampandehanana sy ny fampandrosoana ny Sampana Endoskopie vaovao ao amin’ny Hôpitaly CHUJRA.

Nandritra ny fifanakalozan-kevitra dia nojerena ireo fepetra ilaina amin’ny fampandehanana amim-pahombiazana ity Sampana ity, indrindra ny fandaminana ny fitantanana, ny fanendrena ireo mpitsabo manam-pahaizana manokana, ny fanamafisana ny isan’ny mpiasa ary ny fametrahana rafitra ara-bola maharitra.

Nohamafisina ihany koa ny maha-zava-dehibe ny fanatsarana ny kalitaon’ny fitiliana sy ny fitsaboana, indrindra ho an’ireo marary mila fitsaboana manokana na vonjy taitra noho ny aretina mahazo ny taovam-pandevonan-kanina.

Ankoatra ny asa fitsaboana, dia kendrena ny hampivelatra ity Sampana ity ho Foibe Nasionaly misahana ny endoskopie, ny fanofanana ary ny fikarohana ara-pitsaboana, ka hanamafy ny fahaiza-manaon’ireo mpiasan’ny fahasalamana sy hanatsara ny tolotra omena ny vahoaka.

Mifanaraka amin’ny Politika Ankapoben’ny Fanavaozana izao tetikasa izao izay mikatsaka hatrany ny tombontsoan’ny vahoaka Malagasy amin'ny alalan'ny fanamafisana ny rafi-pahasalamana eto Madagasikara sy ny hahafahan’ny tsirairay misitraka tolotra ara-pahasalamana mifanaraka amin’ny filàny.

Tanjona iombonana araka izany ny fanatsarana ny kalitaon’ny fitsaboana sy ny fanitarana ny fahafahan’ny rehetra misitraka izany.

MIASA MIARAKA HO AN’NY FANOVANA, MANASITRANA NY FIRENENA.